Komisioni për Punë të Jashtme dhe Diasporë, kryesuar nga Haki Abazi, kryetari i Komisionit, ka mbajtur sot mbledhjen e radhës, në të cilën ka raportuar Besnik Bislimi, zëvendëskryeministër i parë për Integrim Evropian, Zhvillim dhe Dialog në Qeverinë e Republikës së Kosovës.
Raportimi i sotëm ishte në kuadër të fushëveprimtarisë së Komisionit dhe kishte të bënte me dialogun Kosovë- Serbi, përkatësisht planin franko-gjerman, i përkrahur edhe nga BE.
Gjatë raportimit, zëvendëskryeministri Bislimi, foli për tri çështja që janë përfshirë dhe diskutuar gjer më tani në këtë proces.
Fati i të zhdukurve, çështje kjo për të cilën ai paralajmëroi se deri në fund të janarit mund të nënshkruhet një marrëveshje, pastaj, targat dhe çështja e energjisë ishin tema për të cilat zëvendëskryeministri Bislimi, njoftoi anëtarët e Komisionit.
Për sa i përket marrëveshjeve që ka të bëjnë me energjinë, Bislimi vlerësoi se ajo është zbatuar pjesërisht, ndërkaq, marrëveshjen me palën serbe, e që ka të bëjë me targat, po ashtu e vlerësoi të favorshme.
Për sa i përket vazhdimit të dialogut Bislimi, vuri në spikamë gatishmërinë e Qeverisë për të vazhduar atë. “Kemi vullnet të bisedojmë për marrëveshje gjithëpërfshirëse dhe ligjërisht të obligueshme”, u shpreh Bislimi.
Ndërkaq, vijoi ai, dialogun për normalizim duhet ta shohim në kontestin e ri politik, pas agresionit të Rusisë ndaj Ukrainës.
Duke folur për planin franko- gjerman, ai bëri të ditur se lidhur me këtë, ka një dakordim mes palëve që përmbajtja e tij të mbetet konfodenciale.
Në vijim, zëvendëskryeministri Bislimi, u është përgjigjur edhe pyetjeve dhe shqetësimeve që ngritën anëtarët e Komisionit.
Një pjesë e këtij takimi është zhvilluar pa prezencën e mediave.