Komisioni për Integrim Evropian, në mbledhjen e sotme, të drejtuar nga kryetarja Rrezarta Krasniqi, shqyrtoi në parim tri projektligje.
Kështu, komisioni shqyrtoi Projektligjin nr. 08/L-068 për ratifikimin e “Amendamentit nr.1 të Marrëveshjes Financiare për IPA 2016, ndërmjet Republikës së Kosovës dhe Bashkimit Evropian”, për të cilin foli Besnik Bislimi, zëvendëskryeministër i parë për Integrim Evropian, Zhvillim dhe Dialog në Qeverinë e Kosovës.
Pas prezantimit të zëvendëskryeministrit Bislimi dhe diskutimeve të deputetëve, komisioni përkrahu projektligjin dhe e procedoi për shqyrtim të mëtutjeshëm në Kuvend.
Po ashtu komisioni shqyrtoi nga aspekti i përputhshmërisë me legjislacionin e BE-së Projektligjin për tregtinë me produkte të naftës dhe karburante të ripërtërishme dhe atë për dërgimin e Forcës së Sigurisë së Kosovës jashtë vendi, me amendamentet e komisioneve funksionale, duke i rekomanduar seancën miratimin e tyre.
Në këtë mbledhje komisioni diskutoi edhe për aktivitetet e parapara për periudhën në vijim.
